اللقاء الأول ... معه

اللقاء الأول

ما ادري كيف أبدأ و شو أقول  .. قلت بكتب بالعامية ..

 نسيت اصف حروفي بالفصحى
ما عرفت .. بس عرفت شي واحد اني اول ما شفته .. انتشيت 
يمكن سافرت بعيونه لمكان بعيد فضا غير عن اي فضا  ..

 فلك ثاني  ما فيه الا انا و هو
تلاقت العيون و سكت الكلام صمت في داخلي و قلبي ينبض و يغني

 أحلى اغاني العشاق شوي أسمع علي بحر و شوي حمود ناصر .. فيروز من صوب

 و عبدالحليم من مكان
نوال الكويتية تقول لي حالة حنان .. و اسمع الرويشد يقول لي لمني بشوق و احضني
ما ادري كل الأغاني حسيتها في لحظة انها عني و عنه ...
تنشقت عطره بالسر من غير ما يدري  .. وقفت وراه اتنفسه و كان ودي اكونا نفاسه
عانقته بعيوني و حضنت وجوده معاي .. شفت الساعة ودها تمر بعقاربها .. طالعتها بنظرة غضب
و قلت لها وقفي شوي .. هذا الغالي عندي .

شفته .. عيوني عانقت رموشه .. قلت بشعر .. بقول نثر  .. ما ادري اكتب عن كل عين رواية
صدقوني عيونها قصة خيالية .. طرفه كحيل .. شفته و عيوني غنت له ..
شفايف سكر .. ما ودي أذوق خفت يرتفع السكر بدمي و ادوخ .. وقفت اشوفه لحظات ودي تكون سنين ... اول ما تلاقينا خفت .. قلت ما بقى وقت و نتفارق .. شسوي هذا الشوق .. صدقوني و هو معاي كنت مشتاق له .. كيف لو رحل ولا ابتعد .. . ضاعت حروفي و ما عرفت اتكلم . . قمت اتلعثم ... اغلب كلامي بدايته امممممم ... ااااااه ... اممممم ... الملم حروفي اللي تبعثرت
كلها راحت للغزل .. ما بقى في عقلي اي كلام منطقي يقولونه البشر .. بس غزل في غزل ..

تكلم و كلامه همس .. جنني .. حروفه اللي ينطقها ودي ألحنها و اغنيها .. لخبطني .. دمرني
كل اللي اعرفه انه بعثرني .. ايدي تاكلني تكلمني .. تعاندني تقول لي : ودي ألمسه .. سلم عليه
ما عرفت امسك ايدي ولا كل ما فيني .. كنت ابي احضنه .. انام في حضنه و لا اقوم .. اغرق .
صدقوني اكتب و صورته جدامي .. ما اقدر افارقه .. صار كل حياتي .. انفاسي ..
عيوني ما تشوف الا نوره .. ملامحه هي النظر  ..
ما ادري فكرت وايد قبل لا اكتب و قلت شو اسميه ... شو اقول ... كيف اشارك الناس مشاعري
كيف ابوح لكم بهالاحاسيس اللي ما تشوف الا فلان ...  فلانة
تدرون شو اسميها  ...

ماي عيني  ....

هيه اليوم اسميها ماي عيني ... و هي صدق ماي عيني  .