لكــ يا أنت

كتبتها لك بس أنت يلي مافي بقلبي غيرك انت ..

مشتاق يا من علمتني كيف اشتاق .. كيف تخليني أسميك مجرم ؟
علمتني الوله و اشعلت النار و ابتعدت .. عود لي طفي نيراني زادت
مجرم بس ما بشتكي .. ما بروح المحكمة .. جنيت و يا زين الجناية

علمتني الشوق و خليتني اتعذب و أتلذذ في عذابي .. ما قمت اشوف الا انت

صورتي بالمراية انت .. قمت اشوف البشر انت .. في بيتنا .. الشوارع .. افتح قناة ورا قناة اشوفك فيها .. الاخبار .. المسلسلات .. الاغاني .. الاعلانات

يكلموني اسمعهم انت ..

اشوفهم انت ..

أكل و الزاد انت ..

اتنفس و هواي انت ..

اتذكر و ذكرياتي  انت ..

ابدع بفني و فني انت ..

النظر و كل الحواس انت ..

الخيال و الأحلام انت ..

حتى الواقع انت ..

يا ضواي انت ..

همس صوت صراخ نوح .. انت بس انت

علمتني كيف تبعثر دقات قلبي .. و تنظم اوقات لهفتي لك .. اشتاق لك صبح و مسا .. نوال الكويتية تغني اشوفك في صوتها .. في كلمات اغاني فيروز احسك .. بين أوتار جيتار فرقة الأخوة .. بصوت الرويشد .. و آهات البحر .. في الموشحات الأندلسية .. حتى في الموسيقى الصوفية اتصوفت بشوقي .. حتى اسمي الثلاثي صار ,, شوق وله لهفة ,,

أرجع .. ترى بيتي محتاج أبواب .. عايش بليا سقف .. تعال يا عامود البيت

يا ساس الأرض .. ارجع لي ترى ابي شمسك تشرق تلامس خدي اول الصبح

يا فجر بارد .. يا نسيم به عطر الدار .. تعال يا وقت العصر بكل حلاوته ترجعني به طفل يلاحق غيوم سماك .. ارجع لي يا ليل اغمض بك عيوني و أحلم .. اتدفى بك و انام .. مشتاق و الشوق اغنية كل يوم أغنيها و الناس عرفت كلماتها و حفظت حروفها و ترددها معاي .. ارجع لي يا اسم الشوق و عنوانه .. يا الوله و كل ألوانه ..

أرجع لي و خلني اعيش بك يا وطن الحب .. يا انت